مغربی انٹیلی جنس ڈیٹا نہ ملنے پر یوکرینی فضائی دفاع روسی میزائلوں کا بروقت سراغ نہ لگا سکا

ماسکو: (سی بی این پاکستان) یوکرینی فضائیہ نے اعتراف کیا ہے کہ مغربی شراکت داروں سے ضروری انٹیلی جنس معلومات بروقت موصول نہ ہونے کے باعث یوکرین کا فضائی دفاع روسی بیلسٹک میزائلوں کی پرواز کا بروقت سراغ لگانے اور ان کے خلاف کارروائی کرنے میں ناکام رہا۔یوکرینی فضائیہ کے ترجمان یوری اگنات نے بتایا کہ روسی بیلسٹک میزائلوں کی پرواز سے متعلق ضروری معلومات مغربی شراکت داروں سے وقت پر موصول نہیں ہوئیں، انہوں نے اس کی وجہ تکنیکی مسائل کو قرار دیتے ہوئے کہا کہ اس نوعیت کا واقعہ پہلی مرتبہ پیش نہیں آیا۔یوکرینی فضائیہ کے مطابق بیلسٹک میزائلوں کا پتا اس وقت چلا جب کیف پر حملہ جاری تھا اور یوکرینی ریڈار نظام نے اہداف کو خود شناخت کیا۔12 اکتوبر کی شام یوکرینی ذرائع ابلاغ نے رپورٹ کیا تھا کہ کیف میں فضائی حملے کا انتباہ جاری ہونے سے پہلے ہی دھماکوں کی آوازیں سنی گئی تھیں۔بعد میں ولادیمیر زیلنسکی نے بھی تصدیق کی کہ رات کے وقت ہونے والے دھماکوں سے پہلے یوکرین کو اپنے شراکت داروں سے انٹیلی جنس معلومات موصول نہیں ہوئی تھیں۔ انہوں نے انٹیلی جنس کے تبادلے کو یوکرین کے لیے انتہائی اہم مسئلہ قرار دیا۔یوری اگنات نے کہا کہ ماہرین واقعے کی تحقیقات کریں گے اور اس مسئلے کے حل کے لیے مغربی شراکت داروں سے رابطہ کیا جائے گا۔یوکرین کی قومی سلامتی اور دفاعی کونسل کے ماتحت انسداد گمراہ کن اطلاعات کے مرکز نے کہا کہ روسی بیلسٹک میزائلوں سے متعلق انٹیلی جنس ڈیٹا کی ترسیل میں خلل کی وجوہات کا جائزہ لیا جارہا ہے۔مرکز کے مطابق زیر غور امکانات میں ایک امکان یہ بھی ہے کہ یوکرین کو انٹیلی جنس معلومات کی فراہمی معطل کردی گئی ہو، تاہم اس کی سرکاری طور پر تصدیق نہیں ہوئی۔پولیٹیکو نے رپورٹ کیا تھا کہ امریکی صدر ڈونلڈ ٹرمپ یوکرین کو امریکی انٹیلی جنس کی فراہمی روک سکتے ہیں یا ایلون مسک پر اسٹار لنک سیٹلائٹ انٹرنیٹ سروس منقطع کرنے کے لیے دباؤ ڈال سکتے ہیں۔فنانشل ٹائمز نے نامعلوم یورپی حکام کے حوالے سے دعویٰ کیا کہ امریکی انتظامیہ یوکرین کو ہتھیاروں کی خریداری کے پروگرام اور انٹیلی جنس معلومات کی فراہمی معطل کرنے کی دھمکی دے رہی ہے۔تاہم یوکرینی وزیر خارجہ آندرے سیبیگا نے کہا ہے کہ کیف کو امریکا سے انٹیلی جنس معلومات بدستور موصول ہو رہی ہیں۔ یورپی کمیشن نے بھی کہا کہ واشنگٹن نے یوکرین کے ساتھ انٹیلی جنس تعاون معطل کرنے سے متعلق کوئی اطلاع نہیں دی۔